#244. Óskiljanlegt!

Er nema von að álag sé á dómstólum landsins þegar eitt fyrirtæki beinir öllum viðskiptavinum sínum fyrir dómstóla með sama ágreininginn? Hvers vegna FME grípur ekki inn í starfsemi fjármálafyritækis sem ítrekað tapar málum fyrir dómstólum og hefur orðið uppvíst af að brjóta lög er mér algjörlega hulið!

Lýsing í 874 dómsmálum

#243. Auglýsing!

Í fréttinni er haft eftir Þór Jóns­syni, upp­lýs­inga­full­trúa Lýs­ing­ar, að Hæstiréttur geri ekki kröfu um að öll sam­bæri­leg lán verði end­ur­reiknuð held­ur þurfi að skoða hvert og eitt mál þegar það kem­ur inn. Sem sagt nýjasta útskýring spunameistara Lýsingar um Hæstaréttardóma: Niðurstaðan á bara við um einn samning!

Hæstiréttur hefur aldrei gert kröfu um að aðrir samningar en sá sem rétturinn fjallar um hverju sinni, verði leiðréttir samkvæmt niðurstöðu máls, og mun aldrei gera slíka kröfu. Niðurstaða réttarins er hins vegar túlkun á lögum og þar með fordæmisgefandi fyrir uppgjör annarra sambærilegra samninga. Og Lýsingu ber að fara eftir túlkun réttarins á lögum.

Ég auglýsi eftir Fjármálaeftirlitinu og Neytendastofu, og ekki síður eftirlitsaðila þessara stofnana, umboðsmanni Alþingis, til að fylgja eftir með frumkvæðisathugun að niðurstaða þessa máls verði heimfærð á alla aðra sambærilegra samninga.

En bergmálið er ærandi!

 

Eiga ekki frumkvæði að endurreikningi

#242. Búin!

Já ok....getur maður sem sagt hafnað því á eigin forsendum að mæta fyrir stjórnskipunar- og eftirlitsnefnd Alþingis?! Ég stóð í þeirri meiningu að ef einhver fær boð um að mæta á fund þingnefndar er hinum sama skylt að mæta, sbr. 19.gr. þingskapalaga:

"19. gr. [Nefndarfundi mega auk nefndarmanna sitja starfsmenn nefndanna og þeir gestir sem nefnd kveður til funda eða fellst á að komi fyrir nefndina." [leturbreytingar mínar]

Vissi ekki að þingmenn hefðu val um að mæta ekki ef það hentaði þeim ekki af einhverjum ástæðum, en samkvæmt orðalagi bréfs formanns nefndarinnar var Hönnu Birnu boðið að mæta á nefndarfundinn: http://www.mbl.is/frettir/innlent/2015/03/13/ogmundur_sendir_honnu_birnu_itrekun/

Hins vegar er þetta ágætt. Ferill Hönnu Birnu í landsmálapólitíkinni ætti að vera fljótlega á enda, en þegar kemur að Sjálfstæðisflokknum er ekki á vísan að róa hvað slíkt mat varðar.

Kemur ekki fyrir nefndina

#241. Ólæsir?

Makalaus yfirlýsing frá Landssambandi lífeyrissjóða að núvirðingarprósenta sé ekki sama og raunávöxtun. Eins og ég hef bent á áður vinna fréttamenn mbl.is fréttir með því að apa upp texta úr yfirlýsingum fyrirtækja og spyrja engra spurninga tli frekari upplýsingar. Svona yfirlýsing kallar að sjálfsögðu á að Landssamband lífeyrissjóða útskýri fyrir ólærðum hver munurinn er á núvirðingarprósentu og raunávöxtun.

Það er nefnilega svo að reglugerð nr. 391/1998 um skyldutryggingu lífeyrisréttinda og starfsemi lífeyrissjóða, tiltekur sérstaklega að við núvirðisreikning væntanlegs lífeyris og framtíðariðgjalda skuli miða við 3,5% vaxtaviðmiðun umfram vísitölu neysluverðs. (19.gr.) Ég skil þetta svo að um raunávöxtun sé að ræða, því öll ávöxtun umfram vísitölu neysluverðs er raunávöxtun, og ef lífeyrissjóður ætlar að standa við skuldbindingar sínar skv. núvirðisreikningi hlýtur hann að þurfa að fá sömu raunávöxtun og notuð er við þann útreikning.  Ennfremur tiltekur 20.gr. sömu reglugerðar að við núvirðingu verðtryggðra verðbréfa með föstum tekjum skuli miðað við 3,5% raunávöxtunarkröfu. Ekki flókið hélt ég.

Yfirlýsing landssambandsins er því ekki bara villandi heldur beinlínis röng. Ef sá aðili sem hana samdi er í ábyrgðarstöðu hjá lífeyrissjóði, eða sjóðum, á hann að segja af sér hið snarasta.

Núvirðingarprósenta er ekki ávöxtunarkrafa

#240. Uppfæra þarf vefumsjónarkerfin

Þegar þetta er ritað kl. 17:00 er síða Sögusetursins, njala.is ekki virk. Uppfletting á afriti af vefnum á vefafritunarvélinni web.archive.org, virðist benda til þess að síðan keyri á gamalli útgáfu af Wordpress vefumsjónarkerfinu, jafnvel allt að 4 ára gamalli.

Það er eitt að setja upp vefsíðu, og annað að halda henni við, og þeim grunni sem hún keyrir á. Þetta er þó alltaf nauðsynlegt og stundum er minna mál en menn halda að uppfæra í nýjustu útgáfur vefumsjónarkerfa. Þó getur líka nokkur kostnaður verið fylgjandi uppfærslum, sérstaklega ef miklar breytingar hafa átt sér stað í vefumsjónarkerfinu, eða ef uppfærslur hafa ekki verið gerðar reglulega. Þá getur þurft að uppfæra/lagfæra útlit vefsins, sem og ýmsar viðbætur sem notaðar eru til að auka virkni svona kerfa.

En fyrst og fremst er þó nauðsynlegt að umsjónarmaður vefs hafi einhverja smá hugmynd um nauðsyn uppfærslna og sjái til þess að þær séu framkvæmdar reglulega. Með því er hægt að minnka hættu á að óprúttnir aðilar skemmi vefsíður eins og Sögusetrið hefur lent í.

Ríki íslams á njala.is?

#239. Temps-á?

Er nú farið að "íslenska" nafn Thames-ár sem Temps, eða er landafræðiþekkingu blaðamanns virkilega svo áfátt að ekki er hægt að koma nafni þessa fræga breska kennileitis frá sér skammlaust?

Þyngdaraflinu storkað

#238. Heyrðu Víglundur.....!

Skuldar þú ekki ríkinu peninga, Víglundur? Hvar er þitt siðferði?!

Ég vil minna almenning á að Víglundur tók þátt í því, ásamt syni sínum Þorsteini og fleiri aðilum, að hirða Sementsverksmiðjuna af ríkinu fyrir skitnar 68 milljónir, en greiddi svo aldrei umsamið kaupverð!

http://www.mbl.is/frettir/innlent/2012/12/03/12_milljonir_fyrir_sementsverksmidjuna/

Við kaupin var birgðastaðan um 400 milljónir, og hús og tæki metin á 1.000 milljónir. En rétt er að taka fram að á móti eignum voru nokkrar skuldir. Þar að auki átti SV hlut í Einingaverksmiðjunni sem metinn var á 211 milljónir. Fróðlegt væri að vita hvar sá eignarhlutur er í dag eftir gjaldþrot Íslenskts sements! Bara tækjaflotinn, sem fylgdi með í kaupunum fyrir 68 milljónir, og endaði svo reyndar að hluta í rekstri hjá BM Vallá, var líklega um helmingurinn af umsömdu kaupverði sem, þegar upp var staðið, var svo aldrei greitt ríkinu!

Hversu oft þurftir þú, Víglundur, að greiða inn á skuldir við Sementsverksmiðjuna áður en bílstjórunum var leyft að dæla meira sementi í tanka BM Vallár?! Og hvað ætli Sementsverksmiðjan hafi þurft að afskrifa háa skuld BM Vallár við gjaldþrotið?

Flottir svona pappakallar sem orga á torgum og gráta þegar þeirra eignir eru hirtar af þeim eftir að hafa spilað rassinn úr buxunum en hirða ríkiseignir í gegnum hlutafélög!

 

„Þetta heldur náttúrulega engu vatni“

#237. Meira af þessu!

„Ísland er mjög lítið land... Múr­arn­ir milli stjórn­mála­manna og emb­ætt­is­manna eru afar þunn­ir,“

Ólafur talar náttúrulega af áralangri reynslu af íslensku spillingunni, sérstaklega þessari sem tengist framsóknarmönnum.

http://eyjan.pressan.is/silfuregils/2009/01/20/olafur-olafsson-einkavaeding-bankanna-og-politisk-spilling/

Ber stjórnmálamenn þungum sökum

#236. 5+ milljarðar and counting...

Hvað á að eyða miklum skattpeningum í þessa hít?

Vegur lagður með hafnargarðinum

#235. Æðibunugangur ASÍ!

Við fyrstu sýn virðist mér lögfræðingur ASÍ hlaupa á sig og hrósa sigri yfir Primera of snemma. Þegar dómurinn er lesinn sést, að um er að ræða pólskt fyrirtæki sem gerir ráðningarsamninga beint við pólska starfsmenn og sendir þá til Finnlands að vinna fyrir útibú sitt í Finnlandi. Sem sagt allir málsaðilar eru innan Evrópusabandsins. En þar sem bæði löndin eru í Evrópusambandinu úrskurðar dómurinn að af þeim sökum eigi starfsmennirnir rétt á launakjörum samkvæmt finnskum kjarasamningum.

Af fréttinni má ráða að Primera, hvers lenskt sem það telst, er ekki með samninga beint við starfsmenn sína, hvaðan sem þeir koma, heldur við starfsmannaleigu á Guernsey, sem er ekki í Evrópusambandinu. Og þar fellur málatilbúnaður ASÍ um sjálfan sig, því samningssambandið er ekki það sama og í fyrrgreindu máli pólska fyrirtækisins. Sem sagt ekki eru allir aðilar í keðjunni innan ESB.

En þessu máli tengdu koma í hugann fyrirtæki eins og ÍSTAK og/eða Suðurverk, sem hafa starfað við verkefni erlendis og sent Íslendinga til starfa í Noregi. Ég tek það fram að ég veit ekkert um á hvaða samningum eða hvers konar kjörum þeir starfsmenn hafa unnið, en athyglisvert væri að vita hvað ASÍ hefur aðhafst varðandi þá starfsmenn, og hvaða athuganir ASÍ hefur látið fara fram á starfsmannakjörum vegna þeirra ráðninga.

En hvað mál Primera varðar held ég að þar hafi ASÍ ropað af ástæðulausu.

Geirneglir starfsemi Primera